Ռուսաստանից գրեթե բենզին չենք ներկրում․ ՄՊՀ նախագահ
Վերջին օրերին բենզինի շուկայում նկատվող գնաճը պայմանավորված է միջազգային շուկայում տեղի ունեցող փոփոխություններով։ Լրագրողների հետ զրույցում այս մասին ասաց Մրցակցության պաշտպանության հանձնաժողովի նախագահ Գեղամ Գևորգյանը։
Նրա խոսքով՝ Հայաստանում վերջին տարիներին վառելիքի գները հիմնականում եղել են միջազգային շուկայի գների արտացոլմանը համապատասխան, իսկ ներմուծման աղբյուրների դիվերսիֆիկացման արդյունքում հնարավոր է եղել որոշակիորեն մրցակցային գներ ապահովել։
«Մենք վերջին մեկ տարվա ընթացքում ամեն ամիս մոնիթորինգ ենք իրականացնում՝ հետևելով և՛ ծավալներին, և՛ գներին։ Աշխարհում փոփոխություններ կան, բենզինի և դիզելային վառելիքի շուկաները գտնվում են անկայուն վիճակում, և դրա հետ կապված գները փոքր-ինչ բարձրացել են»,- նշել է Գևորգյանը։
Նա ընդգծել է, որ այս պահին խոսքը վերաբերում է վերջին 2-3 օրվա ընթացքում արձանագրված փոփոխություններին, և վերջնական պատկերը դեռ պետք է գնահատվի։ Գեղամ Գևորգյանը նաև անդրադարձել է Ռուսաստանից վառելիքի ներկրման նվազմանը՝ նշելով, որ ռուս-ուկրաինական պատերազմի հետևանքով արդեն մի քանի տարի է՝ այդ ուղղությամբ խնդիրներ կան։
«Մենք արդեն մոտ 2-3 տարի է՝ Ռուսաստանից գրեթե բենզին չենք ներկրում, դիզելային վառելիքի հետ կապված էլ խնդիրներ են եղել»,- ասել է ՄՊՀ նախագահը։
Լրահոս
Թրենդ
