«Գալով արտերկրից՝ փորձել ենք Երևան բերել նոր մոտեցումներ ու նոր ոճ». համաշխարհային պրեմիերա՝ Մայր թատրոնում

Մայիսի 6-ին և 7-ին Գ․ Սունդուկյանի անվան ազգային ակադեմիական թատրոնում տեղի կունենա «Կարլ Մարքս․ Խոստովանություններ» ներկայացման պրեմիերան, որը թատրոնի տնօրեն Վարդան Մկրտչյանի խոսքով՝ նոր էջ է թատրոնի պատմության համար:

«Կարող ենք համարձակ նշել, որ սա Համաշխարհային պրեմիերա է: «Կարլ Մարքս. Խոստովանություններ» ներկայացումը իր ձևաչափով առաջին անգամ ներկայացվելու է Մայր թատրոնում: Մեր թատրոնի կարևորագույն խնդիրներից է նորամուծություններ իրականացնել և համագործակցել լավագույն արվեստագետների հետ: Եվ այսօր նախագիծը ի ուրախություն բոլորիս իրականություն է դառնում»,- նշեց Վարդան Մկրտչյանը:

Ներկայացման հիմքում Մարքսի, նրա ընտանիքի անդամների և Էնգելսի նամակներն են։ Պիեսի հեղինակը և բեմադրիչը Հայկ Կարապետյանն է։ Վերջինս Հայաստան է հրավիրվել Լատվիայից, որտեղ բեմադրել է թատերական ներկայացումներ, օպերաներ, նկարահանել է մի շարք ֆիլմեր։

Բեմադրիչ Հայկ Կարապետյանը պրեմիերայից առաջ հույս հայտնեց, որ հանդիսատեսը կգնահատի իրենց մեծ աշխատանքը և այս ներկայացման շնորհիվ կտեղափոխվի մեկ այլ աշխարհ, կկտրվի առօրյա կյանքից և այդ մեկ ու կես ժամը կապրի Մարքսի աշխարհում:

«Կարլ Մարքս․ Խոստովանություններ» ներկայացման դերակատարներն են Արմեն Քուշկյանը, Արաքսյա Մելիքյանը, Ռուզաննա Հախնազարյանը, Հայկ Իսրաելյանը, Սաթենիկ Գասպարյանը, Ջուլիա Մովսեսյանը։

«Ներկայացման ընթացքում ընտանիքի անդամների դերակատարները փոխարինելու են միմյանց՝ ընդգծելու համար, թե ինչպես Կարլ Մարքսի անձն ու գաղափարները խորապես թափանցել են նրանց կյանք՝ ջնջելով նրանց անհատականությունը և ստիպելով նրանց բոլորին, որոշակի իմաստով, ապրել հենց Մարքսի կյանքը և կիսել նրա ճակատագիրը»,- նշեց բեմադրիչը:

Ներկայացման մեջ հնչող Բախի երաժշտությունը հատուկ այս նախագծի համար կատարել է հայտնի դաշնակահար Հայկ Մելիքյանը։ Նամակները հայերեն է թարգմանել Զավեն Բոյաջյանը։

Ներկայացման բեմանկարչության և լուսային ձևավորման հեղինակը Ա․ Ջ․ Ուայսբարդն է՝ ԱՄՆ-ից:

«Ջանք չխնայելով բոլորս միասին աշխատեցինք, և ինձ համար շատ հետաքրքիր էր աշխատել այս թիմի հետ: Թատրոնի աշխատանքը համագործակցության մասին է։ Գալով արտերկրից՝ ես փորձել եմ Երևան բերել նոր աշխատելաոճ, մոտեցումներ, նոր ոճ։ Մենք գտել ենք այնպիսի պատկերներ, իրավիճակներ և համատեքստ, որը ստիպում է նորովի ընկալել գրական հիմքը։ Մեծ հաճույք էր համագործակցել թատրոնի թիմի հետ և նրանց հետ կերտել նոր և հետաքրքիր ներկայացում»,- հավելեց Ուայսբարդը: