Բագրատ Գալստանյանն ԱԺ գնալու պատճառ չուներ, դա պարզապես շոու էր՝ ցույց տալու, որ քաղաքական գործընթացներ են տեղի ունենում»,-Zarkerak.am-ի հետ զրույցում, անդրադառնալով Բագրատ Գալստանյանի ԱԺ-ում ընդդիմադիր խմբակցությունների հետ կայացած հանդիպմանը, ասաց քաղաքագետ Էդգար Առաքելյանը:

Առաքելյանի խոսքով՝ Գալստանյանն ու այն մարդիկ, ում հետ հանդիպել է՝ նույն թիմից են. «Համոզված եմ, որ ամենօրյա ռեժիմով իրենք հանդիպում են, հետևաբար այնտեղ գնալն ու ինչ-որ շոուներ կազմակերպելը կարծում եմ տեղին չէր: Նախ և առաջ Գալստանյանը՝ որպես քաղաքական գործիչ, իրենից ոչինչ չի ներկայացնում, վերջին ամիսների զարգացումները դա ցույց տվեցին: Սրանից ելնելով, բնականաբար, ՔՊ-ն էլ չի գնա, նստի ու քննարկի Բագրատ Գալստանյանի այն պահանջը, թե ինչպես պետք է ՔՊ-ն հեռանա»:

Անդրադառնալով նաև օրեր առաջ Գալստանյանի՝ Սերժ Սարգսյանի ու Ռոբերտ Քոչարյանի հետ հանդիպմանը՝ Առաքելյանը նշեց. «Բագրատ Գալստանյանի գործողությունների հետևում կանգնած են նախկին երկու նախագահները: Նախկինում ևս այցեր ու հանդիպումներ են տեղի ունեցել, այդ այցերը հերթական անգամ ցույց են տալիս, որ ինքը մարիոնետային դեմք է այդ երկու անձանց ձեռքում, ովքեր ուղղորդում են իրեն, թե ինչ անի: Այստեղ կա որոշակի բարոյական մաս. հանրությունը մերժել է այդ երկու անձանց և այսօր Բագրատ Գալստանյանը, ով խոսում է հանրության անունից, գնում ու հանդիպում է մարդկանց հետ, որոնց նույն այդ հանրությունը մերժել է ու մերժել է շատ հիմնավոր պատճառներով: Այսօր փաստացի Բագրատ Գալստանյանը դեմ է դուրս գալիս նաև հանրության պահանջին: Ի՞նչ խորհուրդ պետք է ստանա Գալստանյանը Ռոբերտ Քոչարյանից և Սերժ Սարգսյանից, խորհուրդը, որ կարող են տալ, այն է, թե ինչպես քանդել երկիրը, ինչպես երկիրը թաղել կոռուպցիայի մեջ, ինչպես մսխել երկրի հնարավորությունները, ինչպես մսխել բանակի հնարավորություններն ու այսպես շարունակ:

Սա ևս մեկ անգամ ապացուցում է, որ Բագրատ Գալստանյանը Հայաստանի նախկին քաղաքական էլիտայի հոգևոր շարունակությունն է, այս քայլով Գալստանյանը հերթական անգամ ապացուցում է, որ իր շարժման հետևում կանգնած են այդ մարդիկ: Հասկանալի կլիներ, եթե ինքը հանդիպեր շատ լուրջ մտավորականների հետ, մարդկանց հետ, ովքեր շատ լուրջ հեղինակություն ունեն մեր հասարակության մեջ և բնավ պարտադիր չէ, որ լինեին քաղաքական գործիչներ: Բայց մարդը գնում ու հանդիպում է այնպիսի անձանց հետ, որոնց հեղինակությունը գրեթե զրոյական է: Եթե Սերժ Սարգսյանն ու Ռոբերտ Քոչարյանը Բագրատ Գալստանյանի համար հեղինակություն են, դա չի նշանակում, որ իրենք հեղինակություն են նաև հանրության համար»:

Մեր այն հարցին, թե արդյոք առաջիկա օրերին սպասելի է, որ Գալստանյանի առաջնորդած շարժումը կարող է նորից ակտիվանալ և փողոց դուրս գալ՝ քաղաքագետն ասաց. «Եթե իրենք հույս ունենային, որ փողոցում պայքարը կբերեր հաջողությունների, օրինակ՝ սեպտեմբերի 22-ին սպասվող այդ հավաքը կանեին ոչ թե փակ դահլիճում, այլ հենց հրապարակում: Իրենց գործողությունները միքայլանի են, եկան, հավաքվեցին, հայհոյեցին, ատելության խոսք տարածեցին ու գնացին տուն: Այն սակավաթիվ մարդիկ, ովքեր որոշակի աջակցություն էին ցույց տալիս, նույնիսկ այդ մարդկանց մոտ հիասթափություն է առաջացել: Եթե իրենք զգային, որ փողոցային պայքարի պոտենցիալ ունեն՝ կանեին, բայց քանի որ համոզված են, որ եթե դուրս եկան փողոց, հերթական անգամ խայտառակվելու են, դրա համար դուրս չեն գալիս և գնում են դահլիճ»:

Իսկ, թե արդյոք սեպտեմբերի 22-ին Գալստանյանը որևէ ծրագիր կներկայացնի՝ Էդգար Առաքելյանն ասաց. «Այս շարժման ամբողջ խնդիրը նրանում է, որ դա երևի ամենաապաքաղաքական շարժումն է, նրանք չունեն պլան: Իրենց հիմնական նպատակը վարչապետի հեռացումն է, բայց իրենք չեն ասում հետո ով է գալու, ինչ է անելու, ովքեր են լինելու այդ կառավարության կազմում, Հայաստանն ինչ ուղեծրի մեջ է հայտնվելու, այսինքն՝ բազմաթիվ հարցեր կան, որոնց պատասխանն իրենք չեն տալիս կամ գիտեն, որ այդ պատասխանը հանրության մոտ չի ընկալվի, նրանք փորձում են քողարկված գործել, իրենք նույնիսկ անուններ չեն տալիս: Հետևաբար ծրագրի բացակայությունը բերում է հիասթափությունների, բերում է շարժման անլրջության և բերեց շարժման մարելուն: Իրենց միակ նպատակն իշխանազավթումն է, դա անելուց հետո անցկացնել իրենց չափանիշներով ընտրություն և իրականացնել հերթական հեղաշրջումն իր ամբողջ հետևանքներով, իսկ հետևանքը լինելու է Հայաստանի պետականության կորուստը»