«83 տարվա մեջ առաջին անգամ լռեց «Ամերիկայի ձայնը»»․ Մայքլ Աբրամովից
«Ամերիկայի ձայն» ռադիոկայանի ավելի քան 1300 աշխատակիցներ ուղարկվել են վարչական արձակուրդի։
Այս մասին մարտի 15-ին հայտարարել է ընկերության տնօրեն Մայքլ Աբրամովիցը։
«Խորապես ցավում եմ, որ 83 տարվա մեջ առաջին անգամ լռեց Ամերիկայի լեգենդար ձայնը։ Այսօր առավոտյան ես իմացա, որ «Ամերիկայի Ձայն»-ի գրեթե ողջ անձնակազմը՝ ավելի քան 1300 լրագրող, պրոդյուսեր և օժանդակ անձնակազմ, տեղափոխվել են վարչական արձակուրդի»,- ասել է Աբրամովիցը LinkedIn-ում կատարած գրառման մեջ:
Նա պարզաբանել է, որ ռադիոկայանի մյուս աշխատակիցների հետ իրեն նույնպես ուղարկել են արձակուրդ։ Նրա կարծիքով՝ աշխատակիցների դադարեցման որոշումը ճիշտ չէ։
Հիշեցնենք՝ Սպիտակ տունը մարտի 14-ին հայտնել է, որ ԱՄՆ նախագահ Դոնալդ Թրամփը գործադիր հրաման է ստորագրել մի շարք գերատեսչությունների գործառույթներն ու աշխատանքը նվազեցնելու համար՝ բյուրոկրատիայի դեմ պայքարելու համար, այդ թվում՝ Գլոբալ ԶԼՄ-ների գործակալության (USAGM): Գործակալությունը համակարգում է ԱՄՆ-ի կողմից ֆինանսավորվող լրատվամիջոցների աշխատանքը, այդ թվում՝ «Ամերիկայի ձայնը» և «Ազատություն/Ազատ Եվրոպա» ռադիոկայանը: